الدرب الطويل ..!!

الليل والغربه ونجم سهيـل والـدرب الطويـل يوم التفت للـي سمعـت البارحـه  يطرونهـا

يفز قلبي لجلهـا واقـول ياصبـر(ن)  جميـل كـن المبانـي والزوايـا الصامتـه  يبكونهـا

من بعد غيبتها عرفت ان الفـرح دمـه  ثقيـل وان الحياه الصدق ما تسوى ظفر مـن دونهـا

وان السحاب ان شافني من دونها دمعه  يسيـل وان المطر لاطـاح قربـي اسئلـه  وشلونهـا

وان الظروف القاسيه والحظ والوقـت البخيـل تحرم عيونـي لـذة المنظـر وتعمـي نونهـا

الليل الأسود منتثر والبدر والطـرف  الكحيـل الليـل يشبـه شعرهـا والبـدر ياخـذ لونهـا

تميل اغصان الشجر مع غصنها لا جـا يميـل وتنبت ورود الأرض خجلا تحتويه  اغصونهـا

تميزت في وصفها واستفردت عن كـل  جيـل وصارت حكايه للبشر والنـادره فـي  كونهـا

البارحه ضاع الحكي مني عجزت القـى دليـل وش قصة البارح شياطيـن الفكـر  يسعونهـا

وش قصته في عتمت الظلمه يزيد الليـل ليـل وش قصة الارض والأزمـان لـي  يشكونهـا

وش قصته يوم اذكره في داخلـي ينهـد حيـل وش حيلت اللي هو كتب في دفتـره مجنونهـا

امشي على درب الخطر وقطع دروب المستحيل واقـول ياجعلـي فداهـا فـدوت(ن) لعيونهـا

ياليتها ساعـه بقربـي تشفـي القلـب العليـل اوصف لها عن حالتي من بعدهـا يـا عونهـا

ماعاد ابلقى بعدها في هالبشر شخص(ن)بديـل ولا ابي كل البشر وش هي البشر مـن دونهـا

بعد الذي شفته من البارح حشى ماهـو  قليـل ارحل مع الذكرى اواسي قصـة(ن)  يحكونهـا

قررت اسافر في دروب الشوق قررت  الرحيل امشـي وانـادي الغايبـه لعلـهـم يلقونـهـا

الليل والغربه ونجم سهيـل والـدرب الطويـل يوم التفت للـي سمعـت البارحـه  يطرونهـا